Agjenti i Nico Williams ‘po zhvillon bisedime’ për një transferim të spanjollit

Sulmuesi i Athletic Club, Nico Williams, është lidhur me disa klube të Premier League para afatit kalimtar të verës.

Sipas raportimeve, agjenti i Williams ka zhvilluar bisedime për një transferim të mundshëm, ndërsa reprezentuesi spanjoll po lidhet me disa klube angleze.

22-vjeçari aktualisht luan në La Liga me Athletic Club, ku këtë sezon ka shënuar nëntë gola dhe ka dhënë shtatë asistime në 38 paraqitje.

Megjithatë, tifozët anglezë e njohin më së miri për paraqitjet e tij me Spanjën në Kampionatin Evropian të verës së kaluar, ku shënoi dy herë – përfshirë edhe në finalen kundër Anglisë.

Shumë prisnin që ai të largohej nga Athletic vitin e kaluar, me Arsenalin që ishte i lidhur ngushtë me një transferim të mundshëm, por asnjë marrëveshje nuk u realizua.

Që atëherë, Williams është përfolur si objektiv i Liverpoolit dhe Chelseat, ndërsa këtë verë mund të transferohet më në fund në Premier League.

Por cili klub ka më shumë gjasa ta nënshkruajë?

Edhe pse situata mbetet e paqartë, tifozët e Arsenalit mund të ndihen optimistë, pasi Foot Mercato raporton se drejtori i ri sportiv i klubit, Andrea Berta, është takuar me agjentin e lojtarit ditët e fundit.

Berta, 53 vjeç, iu bashkua Arsenalit në mars dhe pritet të ketë një ndikim të madh në politikat e transferimeve këtë verë.

Në një konferencë për shtyp këtë javë, trajneri i Arsenalit, Mikel Arteta, theksoi se dëshiron të “rrisë cilësinë” e skuadrës për sezonin 2025/26.

“Tani kur do të bëjmë lëvizje të tjera, duam të rrisim thellësinë e skuadrës, por edhe cilësinë dhe aftësitë që na duhen për të bërë hapin e radhës. Do të jetë një afat i madh dhe jemi shumë të emocionuar për të,” tha Arteta.

Williams është nën kontratë me Athletic Club deri në verën e vitit 2027 dhe nëse Arsenali dëshiron ta nënshkruajë, do të duhet të paguajë një shumë të konsiderueshme.

Verën e kaluar, The Athletic raportoi se klauzola e lirimit të tij ishte €55 milionë.