Sfida atraktive Flamurtari-Besa dhe Vora-Burreli

Do të luhet nesër java e 31-të e Kategorisë së Parë. Kur kanë mbetur edhe 3 javë nga përfundimi i sezonit të rregullt, ndeshjet e nesërme mund të japin disa verdikte të rëndësishme në garën për ngjitjen direkte në elitën e futbollit shqiptar.

Vora kryesuese pret në shtëpi Burrelin.

Skuadra e Bellait, që aktualisht ka 8 pikë më shumë se Besa e vendit të tretë, mund të sigurojë matematikisht ngjitjen në Abissnet Superiore në rast të një rezultati pozitiv (pavarësisht rezultatit të Besës në ndeshjen respektive).

Kjo përballje do të transmetohet drejtpërdrejt në RTSH 2 në orën 15:00.

Kryendeshja e kësaj jave të Kategorisë së Parë luhet në Vlorë, aty ku Flamurtari i vendit të dytë do të masë forcat me Besën e vendit të tretë. Aktualisht diferenca mes 2 skuadrave në renditje është 4 pikë dhe kjo përballje direkte mund të vulosë fatet e sezonit. Këtë ndeshje mund ta ndiqni drejtpërdrejt në RTSH Sport në orën 15:00.

Korabi luan në shtëpi kundër Kastriotit, ndërsa Lushnja në transfertë kundër Kukësit. Valbona-Pogradeci dhe Erzeni-Apolonia janë dy takimet e tjera të kësaj jave. Të gjitha ndeshjet do të luhen në orën 15:00.