Manfredas Ruzgis: Jo për mosrespektim, por pasi u përshtata ishte e lehtë për mua

Vora është zyrtarisht në Superiore. Fitorja e sotme në shtëpi përballë Burrelit me rezultatin e pastër 2-0, bëri që skuadra e Vorës të ngjitej në elitën e futbollit shqiptar.

Në përfundim të këtij dueli ka folur sulmuesi i kampionëve, Manfredas Ruzgis, kryegolashënuesi i kampionatit me 24 gola.

“Është krenari të luash këtu.

Ne bëmë shumë këtë sezon, qëndruam të fortë, provuam shumë. Ne e merituam këtë, i gjithë stafi ka bërë shumë për këtë arritje tepër të madhe. Ftesa nga Kombëtarja lituaneze? E kisha njëfarë shprese, por isha i surprizuar. Ka qenë deçizive ndeshja me Besën pasi aty kanë qenë vëzhguesit.

Në Superiore pjesë e Vorës apo ekip tjetër? Nuk është një pyetje për t’u bërë tani. Ne luajtëm një sezon mjaft të mirë dhe shumë njerëz ma kanë bërë këtë pyetje. Por ne kemi edhe dy ndeshje të tjera, duam t’i fitojmë. Tani le të festojmë. Jam shumë i lumtur këtu, s’kam pse largohem. Të shohim çfarë do të ndodhë.

Fillim jo i mirë, çfarë ndryshoi? Fillimi ka qenë tepër i vështirë për mua, sepse ishte një shtet i ri. Tabaku ishte ai që më ndihmoi dhe më tha që presidenti dhe trajneri më besonin, merr kohën tënde. Më pas ishte normale për mua që të shënoja. Është ligë e mirë, por ekipi më ndihmoi shumë që të shënoja, s’jam vetëm unë, por i gjithë ekipi”, është shprehur Ruzgis.