Laporta: Flick është mjeshtër, po punojmë shumë mirë

Barcelona kërkon të kompletojë një sezon historik, duke synuar fitimin e tre trofeve – La Ligën, Champions League dhe Kupën e Mbretit.

Aktualisht, katalanasit kryesojnë kampionatin spanjoll dhe kanë arritur deri në gjysmëfinalet e Champions League, ku do të përballen me Interin.

Një tjetër përballje e madhe i pret më 26 prill, kur në finalen e Kupës së Mbretit do të përballen me rivalët e përjetshëm, Real Madridin, në “El Clasico”-n që do të zhvillohet në Sevilla.

Presidenti i klubit, Joan Laporta, ka shprehur entuziazmin për ecurinë e skuadrës këtë sezon.

“Tripleta? Ajo që mund të them është se po punohet shumë mirë. Jemi të kënaqur me përkushtimin e lojtarëve dhe me mënyrën mjeshtërore se si Hansi Flick po e drejton ekipin,” tha Laporta.

Laporta theksoi edhe përmirësimet në aspektin fizik dhe stilin e lojës që, sipas tij, reflekton thelbin e Barcelonës. “Ekipi është i fortë dhe po luan futboll të bukur që pëlqehet nga tifozët. Çdo detaj po kontrollohet me kujdes, dhe jemi vërtet të kënaqur me rrugëtimin deri tani,” tha numri një i katalansve.