Një familje pakistaneze dënohet me burgim të përjetshëm në Itali

Një gjykatë apeli në Itali ka lënë në fuqi dënimin e përjetshëm të një çifti pakistanez të dënuar për vrasjen e "nderit" të vajzës së tyre 18-vjeçare, pasi ajo refuzoi një martesë të rregulluar.

Trupi i Saman Abbas u gjet në një fermë të braktisur pranë arave ku punonte babai i saj, në veri të Italisë, në nëntor 2022, 18 muaj pas zhdukjes së saj, raporton Independent.

Gjykata e Apelit të Bolonjës vendosi të premten se e gjithë familja mori pjesë në vrasje. Gjykata konfirmoi burgimin e përjetshëm për babanë e saj Shabbir Abbas dhe nënën Nazia Shaheen. Me burgim të përjetshëm janë dënuar edhe dy të afërm, të cilët më parë ishin shpallur të pafajshëm në një gjykatë më të ulët.

Xhaxhai i Samanit, Danish Hasnain u dënua me 22 vjet burg për përfshirjen e tij në vrasje. Ai fillimisht ishte dënuar me 14 vjet.

Gjyqi në Reggio Emilia në Italinë veriore është bërë çështja më e profilit të lartë në një seri procedimesh penale vitet e fundit që përfshin vrasjen ose abuzimin e grave nga familjet emigrante që kundërshtonin martesat e detyruara.

Vrasje të tilla nderi janë të zakonshme në Pakistan, ku anëtarët e familjes ndonjëherë vrasin gra që nuk ndjekin zakonet lokale ose duan të zgjedhin partnerët e tyre. Prokurorët italianë pretendojnë se Saman u vra nga familja e saj më 1 maj 2021. Pak ditë më vonë, prindërit e saj udhëtuan nga Milano në Pakistan.

Babai i saj u arrestua më vonë në Pakistan dhe u ekstradua në Itali. Nëna e saj u dënua në mungesë dhe u arrestua vetëm në maj të vitit të kaluar, pas tre vitesh në arrati. Një dajë, dy kushërinj, babai dhe nëna e Saman Abbas u paraqitën për herë të parë në gjykatë në shkurt të vitit 2023. Të gjithë e mohuan fajin.

Saman Abbas u zhvendos si adoleshent nga Pakistani në Novellara, një qytet bujqësor në rajonin verior italian të Emilia-Romagna. Ajo shpejt adoptoi një mënyrë jetese perëndimore, ndaloi së veshuri hixhabin dhe filloi të takohej me një të ri të zgjedhur nga ajo. Në një postim në rrjetet sociale, ajo dhe i dashuri i saj pakistanez u filmuan duke u puthur në rrugë në Bolonja.

Një autopsi tregoi një kockë të thyer të qafës

Sipas hetuesve italianë, pikërisht kjo puthje ka zemëruar prindërit e saj, të cilët dëshironin që ajo të martohej me një kushëri në Pakistan.

Ajo u pa për herë të fundit e gjallë më 30 prill 2021, disa qindra metra larg vendit ku u gjet më vonë trupi i saj. Kamerat e vëzhgimit e kapën duke ecur me prindërit e saj nëpër fushën e shalqirit ku punonte babai i saj.

Thuhet se ajo i tha të dashurit të saj se kishte frikë për jetën e saj sepse nuk pranoi të martohej me një burrë të moshuar në atdheun e saj. Një autopsi tregoi një kockë të thyer të qafës, me gjasë rezultat i mbytjes.

Në vitin 2019, Italia miratoi një ligj që e bënte detyrimin për martesë të një shtetasi ose rezidenti italian, qoftë edhe jashtë vendit, një vepër penale sipas ligjeve të dhunës në familje. Pas zhdukjes së Samanës, Unioni i Komuniteteve Islame në Itali nxori një fetva fetare kundër martesave të detyruara.