Vrasja e trefishtë në Suedi, 6 të arrestuar

Policia suedeze ka arrestuar gjashtë të dyshuar mbi vrasjen e trefishtë në një sallon flokësh në qytetin Uppsala.

Sulmi ndodhi në prag të festimit të Natës Walpurgis, një festival tradicional pranveror që tërhoqi mijëra njerëz në qendër të Uppsala.

Të arrestuarit janë nga mosha nën 18 deri në 45-vjeç, njoftoi zyra e prokurorit të shtetit, duke shtuar se njëri prej personave dyshohet se ka kryer drejtpërdrejt vrasjet mbrëmjen e së martës.

Një 16-vjeçar i cili u arrestua vetëm disa orë pas sulmit, u lirua të premten. Viktimat ishin të moshës nga 15-20 vjeç.

Policia po heton nëse të shtënat kanë të bëjnë me goditjen e bandave kriminale. Një nga viktimat thuhet se ishte e njohur për policinë, raportojnë mediat lokale. Sipas tyre, personi ishte i përfshirë në një hetim policor për një sulm të planifikuar ndaj një të afërmi të kreut të bandës Ismail Abd, por nuk u akuzua kurrë.

Uppsala, një qytet në veri të Stokholmit, ka qenë skena e konfliktit midis krerëve rivalë të bandave Abda dhe Rawa Majida për vite me radhë. Një valë e re dhune mes grupeve filloi në vitin 2023, kur nëna e Abdit u vra në shtëpinë e saj.

Për të kundërshtuar përshkallëzimin, qeveria suedeze propozoi një ligj të ri që do të lejonte policinë të përgjonte fëmijët nën 15-vjeç.