Vuçiq mbërriti në Moskë për paradën e 9 majit – flet për ndëshkimin e mundshëm nga BE

Presidenti serb, Aleksandar Vuçiq ka mbërritur në Moskë të Rusisë, në prag të paradës së 9 majit, pavarësisht paralajmërimeve për rreziqet për pranimin e Serbisë në BE.

Dhe sipas mediave të huaja, përcjell Telegraif, Vuçiq tha se është gati të marrë përgjegjësi personale për këtë vizitë.

Sipas tyre, ai konfirmoi se është i vetëdijshëm për pasojat e ardhshme të vizitës së tij në Moskë.

“… Jam i bindur se Serbia do të mbetet në rrugën evropiane. Nëse BE-ja dëshiron të ndëshkojë dikë, le të më ndëshkojë mua. Do ta pranoj ndëshkimin dhe do të kërkoj që të mos e ndëshkojnë të gjithë vendin”, ka thënë Vuçiq, duke iu referuar paralajmërimeve të mëparshme të BE-së që me sa duket i injoroi duke shkuar në Moskë.

Siç ishte raportuar, fluturimi i presidentit serb për në Moskë bëri një ndalesë në Azerbajxhan, ndërsa sulmet me dronë ukrainas detyruan aeroportet në të gjithë Rusinë të ndalonin udhëtimet për disa orë, raportuan mediat serbe dhe ruse të mërkurën.

Vuçiq është midis më shumë se dy duzinave udhëheqësve botërorë që pritet të marrin pjesë në paradën e 9 majit në Sheshin e Kuq që shënon 80 vjetorin e fitores së Bashkimit Sovjetik mbi Gjermaninë naziste.

Në mesin e prillit, udhëheqësit e vendeve evropiane e paralajmëruan presidentin serb Aleksandar Vuçiq për pasojat e udhëtimit të tij të mundshëm në Moskë më 9 maj për paradën ushtarake të organizuar nga diktatori rus Vladimir Putin.

Në veçanti, BE-ja vuri në dukje se të qenit në një paradë me pjesëmarrjen e trupave që morën pjesë në luftën e Federatës Ruse kundër Ukrainës do të shkelte “kriteret e anëtarësimit”.