Marotta dhe Moratti: Entuziazëm dhe krenari për finalen e madhe të Interit

Në një takim emocional me Massimo Moratti-n dhe ish-lojtarët legjendarë të Interit, për të përkujtuar fitoren historike të Kupës së Kampionëve më 1965, presidenti aktual i klubit, Beppe Marotta, ka ndarë emocionet e tij në prag të finales së madhe të së shtunës ndaj PSG-së.

“Kam marrë një besim të madh nga pronësia e re, dhe edhe pse nuk mund të krahasohem me Morattin, pasioni dhe ndjesia e përkatësisë janë të pranishme edhe tek unë,” – u shpreh Marotta për Sky Sport.

“Kjo është vetëm finalja e tretë në pesëdhjetë vjet, ndaj ndiejmë përgjegjësi të madhe dhe entuziazëm të jashtëzakonshëm.”

Takimi përkujtimor ishte për Marottën një burim frymëzimi.

“Ishte një ditë e bukur, një kujtim i veçantë për një ndeshje që e kam parë si fëmijë në televizion. Shpresoj që kjo të jetë një shenjë e mirë për finalen e së shtunës.”

Massimo Moratti, ish-presidenti i lavdishëm i Interit, foli gjithashtu me emocion për përvojat e tij në Champions dhe shpresat për këtë edicion.

“Kam përjetuar emocione të mëdha, që nga fëmijëria e deri te finalja në Madrid. Tani shpresoj t’i jetoj përsëri në një stadium të mrekullueshëm si ai i Monakos.

Mendoj se Interi e meriton këtë Champions – ka bërë një turne të jashtëzakonshëm.”

Moratti shtoi edhe një fjalë për trajnerin:

“Shpresoj që Inzaghi të qëndrojë. Është trajner shumë i mirë, skuadra luan bukur dhe këtë sezon ka pasur rezultate të shkëlqyera. Do të ishte vërtet një mëkat të largohej.”

Në prag të finales, Interi mbetet i mbushur me histori, krenari dhe shpresë për të shkruar një tjetër faqe të artë në librin e lavdisë së klubit.