Alonso përcakton rolin e ri për Bellingham te Reali, zbulon ndryshime të rëndësishme për anglezin

Real Madridi i ndau rrugët me Carlo Ancelottin pas një sezoni zhgënjyes dhe ka emëruar ish-trajnerin e Bayer Leverkusen, Xabi Alonso, si zëvendësues të tij.

Nuk është hera e parë që Xabi punon brenda sistemit të Madridit – ai dikur ka luajtur për klubin dhe e filloi karrierën e tij si trajner me ekipin e të rinjve të Realit.

Alonso jo vetëm që është njoftuar, por është prezantuar zyrtarisht edhe në media. Gjatë eventit, ai u përmbyt me pyetje në lidhje me vizionin e tij taktik dhe rolet e disa lojtarëve – shumë prej të cilave u përqendruan te ylli i mesfushës Jude Bellingham.

Sa i përket anglezit, trajneri i ri ka plane serioze. Xabi synon ta ndryshojë stilin e lojës së Jude nga roli sulmues i caktuar nga Ancelotti në një që përqendrohet në kontrollin e plotë të ndërtimit të mesfushës.

“Ai mund të jetë i veçantë kudo sepse Bellingham është unik. Shpërthimi i tij është shenja dalluese e një lojtari që përcakton një epokë për Real Madridin. Ai është vetëm 21 vjeç dhe do të jetë një gur themeli për projektet e ardhshme të klubit”, ka thënë Alonso.

“Ndjej se ai është në një pozicion të shkëlqyer dhe ky është momenti i përsosur për të punuar me të. E shoh si mesfushor. Do të përpiqemi ta bëjmë sa më efektiv të jetë e mundur”, zbuloi Xabi në lidhje me vizionin e tij për Juden.

Emërimi i trajnerit të ri ka të ngjarë të ndikojë jo vetëm në rolin e Bellingham, por edhe në atë të lojtarëve të tjerë të Real Madridit.