Aguero: Të gjithë duan të fitojnë Kupën e Botës për Klube, është fantastike

Kupa e Botës për Klube do të fillojë më 14 qershor me ndeshjen e Inter Miami të Lionel Messit kundër Al Ahly. Sergio Agüero mezi pret të shohë ekipet më të mëdha në botë në veprim në këtë garë të re.

“Do të jetë shumë argëtuese të shohim ekipet më të mira në botë të luajnë në të njëjtin vend.

Do të jetë fantastike për spektatorët dhe për vetë lojtarët”, tha Agüero në një intervistë për FIFA-n.

“Është e re dhe të gjithë lojtarët do të duan të fitojnë. Misioni i tyre do të jetë të jenë të parët që fitojnë këtë turne.

Është gjithmonë mirë të jesh midis pionierëve, të jesh skuadra e parë që fiton Kupën e Botës për Klube”.

Lojtari që u rrit në sistemin e të rinjve të Independientes dhe ka një të kaluar të rëndësishme në ekipin kombëtar të Argjentinës tha se qëndrimi i ekipeve të CONMEBOL do të jetë çelësi për të ecur përpara në ndeshje: “Është koha të tregojmë qëndrimin tonë dhe shpirtin tonë amerikanojugor në këto ndeshje”.

“Mendoj se ata do të luftojnë, është diçka që na vjen natyrshëm neve amerikanojugorëve. Nuk do të jetë e lehtë, por mendoj se do të japin gjithçka për të ecur përpara sa më shumë që të jetë e mundur”.