Përleshje mes ultrasve të Lazios dhe atyre të Real Sociedad, 9 spanjollë të plagosur

Nëntë tifozë të Real Sociedad u plagosën në qendër të Romës gjatë përleshjeve me tifozët e Lazios në prag të ndeshjes së Europa League të së enjtes mes dy skuadrave.

Rreth 70 mbështetës spanjollë u sulmuan nga rreth 80 mbështetës të Lazios në rrugën Leonina, pranë Koloseumit, rreth orës 23:00 të së mërkurës, tha një zëdhënës i policisë së Romës.

Ultrasit e Lazios përdorën objekte të mprehta dhe thika, teksa janë publikuar edhe fotografi të armëve të ftohta që supozohet se janë përdorur në sulm, duke përfshirë një çekiç, shkopinj, çelësa dhe një zinxhir.

Huliganët e Lazios u larguan me mbërritjen e policisë.

Të dyja skuadrat përballen këtë të enjte në 21:00 në "Olimpico" dhe pas përleshjeve të mbrëmshme duket se policia do shtojë masat e sigurisë.