Roma - Juventus, derbi i madh i Italisë

Roma - Juventus do të përballen të dielën në sfidën për të vendosur se kush do të jetë në zonën Champions.

Dy trajnerët kanë zgjedhur të kenë formacion sulmi, duke parë që Bolonja e vendit të katërt do të bëjë llogaritë me Napolin që synon kreun

Të dielën Juve e vendit të pestë do të zbresë në fushën e Romës që renditet e gjashtë në një ndeshje që do të flasë shumë për renditjen në Serie A.

Tjetër ndeshje, tjetër besim për Dusan Vlahovic. Bomberi serb, do të jetë sërish në krye të sulmit të Juventusit në sfidën delikate të së dielës ndaj Romës në "Olimpico", një betejë e rëndësishme për arritjen e objektivit të “Zonjës së Vjetër”: zonën Champions.

Trajneri Igor Tudor, i cili ka një ide të qartë për mënyrën sesi ekipi i tij duhet të sulmojë, preferon një qendërsulmues të fortë fizikisht dhe me referenca të qarta në zonë.

Në përballjen kundër Romës, Juventus pritet të rreshtohet me skemën 3-4-2-1, modul i preferuar nga trajneri kroat, që garanton ekuilibër mes mbrojtjes dhe ofensivës.

Pas performancës së mirë kundër Genoas, Dusan do të jetë sërish në qendër të vëmendjes, i mbështetur nga kreativiteti i Yildiz dhe Nico Gonzalez, ky i fundit në vend të Koopmeiners, i cili po ndjek një program të personalizuar për rikuperim fizik.

Risi e dytë në formacion është kthimi i Timothy Weah në krahun e djathtë, pas impaktit pozitiv që pati në minutat e fundit kundër Genoas, ku iu afrua shumë golit.

Në krahun e majtë konfirmohet McKennie, ndërsa në mesfushë do të vijojë partneriteti Locatelli–Thuram.

Në mbrojtje nuk priten ndryshime, edhe për shkak të mungesave: pas dëmtimit të Gattit , Tudor ka mbetur me alternativa të pakta për repartin defensiv.

Roma do të duhet të bëjë pa Paulo Dybala por gjen sërish Zeki Celik.

Me gjasë turku do të luajë në të djathtë për shkak të mungesës së Alexis Saelemaekers, i cili u pezullua pas kartonit të verdhë që mori në Lecce.

Në mbrojtje konfirmimi i mundshëm i treshes me Gianluca Mancini-Mats Hummels dhe Evan NDicka.

Në mesfushë një lidhje e mundshme me Cristante dhe Konè në të dyja anët e Paredes.

Artem Dovbyk u konfirmua si sulmues me Matias Soulè përpara Eldor Shomurodov.

Juve synon të fitojë 3 pikëshin duke shpresuar që Bolonja të humbasë në ndeshjen me Napolin e vendit të dytë, ndërsa Atalanta e vendit të tretë do të presë Lacion, duke bërë që beteja në vendet e para të jetë tejet e ashpër.