Lufta për mbijetesë në Superligë, Suhareka kërkon ta mposhtë Ballkanin

Kur kanë mbetur edhe dhjetë ndeshje deri në përfundim të edicionit të sivjetmë të Superligës së Kosovës, klubi Suhareka ka objektiv të qartë ta sigurojë ekzistencën në elitën e futbollit kosovar.

Aktualisht skuadra është në luftë direkte me Dukagjinin, Llapin dhe Ferizajn për të shmangur rënien në Ligën e Parë. E pozicionuar në vendin e shtatë, Suhareka ka 32 pikë, aq sa ka edhe Dukagjini në vendin e tetë, pozitë kjo që dërgon në ndeshjet e barazhit.

Pengesa e radhës e Suharekës është Ballkani, një derbi lokal aspak i lehtë që zhvillohet sot nga ora 15:00, raporton KosovaPress. Por, trajneri Mirel Josa thotë se lojtarët e tij janë të gatshëm të marrin rezultat pozitiv ndaj Ballkanit.

Josa: Ballkani ka synimet e veta, por në derbi ne do ta bëjmë lojën tonë

“Është derbi i Suharekës, por mendimi im është që Ballkani do të zhvillojë lojën e tij siç duam ta zhvillojmë edhe ne lojën tonë. Këtu nuk nxirret problemi që njëra skuadër ka nevojë më shumë apo tjetra më pak edhe Ballkani është në vend për të konsoliduar pozitat e veta për sa i përket pikësynimeve që ka”, tha Josa.

Ai shton se fitorja në xhiron e kaluar kundër Malishevës ka dhënë sinjale të qarta se skuadra e tij do të mund që të arrijë objektivin e saj.

Josa: Duam ta shmangim më të keqen - rënien nga Superliga

“Ne duhet ta mendojmë më të keqen dhe më e keqja është kjo që duhet të bëjmë ne, shpëtimi i skuadrës dhe të shikojmë se ku do të shkojmë më lartë për sa i përket edhe cilësisë së lojës por edhe nivelit të skuadrës. Kështu që mua ndeshja me ekipin e Malishevës më dha një indicie dhe kurajë për ta bërë skuadrën ashtu siç kërkojmë”, tha Josa.

Mevlan Zeka, njëri nga lojtarët më me përvojë në radhët e Suharekës, thotë për KosovaPress se ballafaqimit me Ballkanin do t’i qasen me seriozitet të lartë dhe do t’ia arrijnë të dalin faqebardhë.

Zeka: E dimë forcën e Ballkani, por ne duam t’i arrijmë objektivat tona

“Të gjithë e dimë që Ballkani është kampion aktual dhe ne do t’i qasemi ndeshjes me seriozitet dhe besoj që edhe kundërshtarët tanë që janë poshtë tabelës ndeshjet do t’i luajnë mes vete. Ne na mbetet që të fokusohemi te kjo ndeshje dhe të dalim faqebardhë... Duke parë që vendi i katërt është vetëm tri pikë larg nesh, gjithçka është e mundur, sepse çdo fitore është e madhe, por edhe çdo humbje është shumë e madhe. Ne duhet t’i marrim ndeshjet një nga një, i kemi edhe dhjetë sosh. Çdo ndeshje ka rëndësinë e vet, sepse po shkojmë drejt fundit të kampionatit dhe besoj se do t’i arrijmë objektivat e skuadrës”, theksoi Zeka.

Mesfushori Fitim Susuri thekson se trajneri Mirel Josa ka sjellë energji të re në ekip dhe se Suhareka, përveç mbijetesës, kërkon edhe diçka më shumë.

Susuri: Suhareka synon më shumë se sa mbijetesa në Superligë

“Ne sikurse në çdo lojë futemi me një motiv, sepse tani janë ndeshjet e fundit të kampionatit dhe derbi ka një qasje tjetër. Besojmë, se do ta kemi një paraqitje sa më të mirë kundër Ballkanit. Me trajnerin e ri na është kthyer një energji tjetër në ekip, na ka dhënë një motiv tjetër dhe besoj që do të kalojmë shumë mirë në ndeshjet e mbetura... Optimizmi real është shmangja (nga rënia nga Superliga), por të shohim edhe për diçka më shumë”, ka thënë Susuri.

Me fitoren eventuale ndaj Ballkanit, skuadra e Suharekës do të ngjitej në kuotën e 35 pikëve duke bërë një hap të madh drejt sigurimit të ekzistencës në Superligë edhe edicionin e ardhshëm.