Liverpooli bën gati kontratat e reja për Salah dhe van Dijk

Liverpool ka nisur të ndërtojë me kujdes të ardhmen, dhe dy nga shtyllat kryesore të skuadrës, Mohamed Salah dhe Virgil van Dijk, konsiderohen si pjesë kyçe e këtij projekti afatgjatë.

Të dy lojtarët kanë shprehur publikisht dëshirën për të qëndruar në “Anfield”, por janë treguar të shqetësuar për mungesën e ofertave konkrete për rinovim nga klubi.

Drejtuesit e Liverpool-it kanë nisur kontaktet me përfaqësuesit e tyre dhe janë duke punuar për të arritur marrëveshje sa më shpejt.

Optimizmi në kampin “The Reds” është i madh. Klubi beson se rinovimet me dy titullarët do të përmbyllen së shpejti, duke sjellë qetësi dhe stabilitet për të ardhmen.

Interesimi i fundit i Real Madridit për Trent Alexander-Arnold ka alarmuar stafin drejtues të Liverpool-it, i cili nuk dëshiron të rrezikojë humbjen e më shumë yjeve, veçanërisht në një sezon ku kontribuesit kryesorë të skuadrës kanë dhënë maksimumin për objektivat e vendosura.

Rinovimet do të shërbenin gjithashtu si sinjal pozitiv për tifozët, sidomos në një moment kur rrezikohet largimi i një futbollisti që ka dalë nga akademia e klubit dhe cilësohet si një nga mbrojtësit më të talentuar në Evropë.

Heshtja e Salah dhe Van Dijk mbi të ardhmen e tyre po shihet si një tregues besnikërie ndaj Liverpool-it. Firmosja e kontratave të reja jo vetëm që do të siguronte vazhdimësinë e projektit sportiv, por edhe do të largonte pasiguritë për verën që vjen.