Antony lidhet me një transferim befasues në Premier League

Anësori brazilian është lidhur me një rikthim në Premier League, por jo te Manchester United.Dështimi i madh i Manchester United, Antony, është lidhur me një rikthim të befasishëm në Premier League pas paraqitjeve mbresëlënëse në huazimin te skuadra spanjolle Real Betis.

Transferimi i tij prej 82 milionë funtesh në gusht të vitit 2022 te United konsiderohet si një nga blerjet më të dështuara në historinë e fundit të klubit. Me vetëm 12 gola në 96 paraqitje për “Djajtë e Kuq”, trajneri Ruben Amorim vendosi ta lejonte të largohej në huazim te Betis në janar.

Megjithatë, braziliani ka përmbysur gjithçka në Spanjë dhe ka fituar zemrat e tifozëve, duke shënuar 6 gola dhe asistuar 4 të tjerë në 19 paraqitje. Forma e tij ka tërhequr interesin e një klubi tjetër të Premier League, që po shqyrton seriozisht mundësinë për ta transferuar këtë verë.

Sipas një raporti të Metro, Arsenali është klubi që po mendon të bëjë një lëvizje për Antonyn, duke qenë i gatshëm të rivalizojë ofertën e Real Betis, i cili dëshiron ta mbajë brazilianin përfundimisht. Po ashtu, Atletico Madrid raportohet se është në garë për firmën e tij.

United pritet të kërkojë të paktën 25 milionë funte për ta lejuar largimin e tij, por sipas gazetarit spanjoll Marcos Benito për El Chiringuito TV, çmimi mund të arrijë mes 34 dhe 42 milionë funte.

Kjo shumë mund të jetë jashtë mundësive financiare të Betis, duke i lënë Arsenalin dhe Atleticon si favoritë nëse arrijnë marrëveshje personale me lojtarin. Megjithatë, transferimi mund të mos jetë aq i lehtë, pasi Antony vetë ka shprehur dëshirën që të qëndrojë në Betis:

“E gjeta veten, më duhej të isha i lumtur. Më duhej që edhe familja ime të ishte e lumtur. Çdo ditë që kalon, më bind se ishte vendimi më i mirë që mund të merrja.

Po e shijoj qytetin, klubin dhe gjithçka tjetër. Më kujton shumë Brazilin për shkak të diellit, ushqimit dhe njerëzve që janë të lumtur. Të gjitha këto janë të rëndësishme për dikë si unë që është mësuar me një mënyrë të tillë jetese.”