Napoli afër të sigurojë ‘dhuratën De Bruyne’, pas triumfit në Serie A

Raportet nga Italia të shtunën në mëngjes pretendojnë se Napoli është tani pranë sigurimit të një marrëveshjeje me yllin belg të Manchester City-t, Kevin De Bruyne, pas fitores së Scudettos të premten mbrëma.

Napoli janë kampionët e rinj të Italisë, pasi siguruan titullin e katërt në histori të klubit dhe të dytin në tre vitet e fundit me një fitore 2-0 kundër Cagliarit të premten. Interi i ndoqi nga afër deri në fund, por përfundoi një pikë prapa, në vendin e dytë, pavarësisht fitores 2-0 në transfertë ndaj Comos, gjithashtu të premten.

Sipas raporteve të fundit, De Bruyne i ka dhënë miratimin personal kalimit te Napoli, sapo t’i përfundojë kontrata me Manchester City-n në fund të qershorit.

33-vjeçari do të jetë i lirë në treg pas një qëndrimi 10-vjeçar në Etihad, periudhë në të cilën fitoi gjashtë tituj të Premier League-s dhe një trofe të Ligës së Kampionëve, përveç shumë të tjerëve.

Sipas La Gazzetta dello Sport, Napoli tashmë ka paraqitur një ofertë për mesfushorin e Premier League-s dhe është gati të marrë “dhuratën e parë” pas fitores së Scudettos të premten.

Thuhet se Napoli i ka ofruar një kontratë dyvjeçare me një pagë të konsiderueshme, edhe pse jo aq të lartë sa 12 milionë eurot neto që De Bruyne thuhet se përfiton aktualisht te Man City.

Gjithashtu, ka interes për De Bruyne edhe nga MLS, konkretisht nga Chicago Fire. La Gazzetta dello Sport raporton se klubi amerikan është i gatshëm të ofrojë më shumë financiarisht se Napoli, por nuk mund të ofrojë përvojën e Ligës së Kampionëve.

De Bruyne thuhet se ka konsultuar bashkëkombasit e tij Romelu Lukaku dhe Dries Mertens, të cilët kanë luajtur më parë për Napolin, për të diskutuar realitetin e këtij kalimi.

Drejtori sportiv i Napolit, Giovanni Manna, tashmë ka qenë në Manchester për të diskutuar projektin, ndërsa gruaja e De Bruyne ka vizituar qytetin e Napolit për të parë mundësi banimi.