Premier Liga konfirmon datat e afatit kalimtar veror
- Bota Sot
Premier Liga ka konfirmuar se afati kalimtar i kësaj vere do të ndahet në dy periudha të veçanta pas votimit të klubeve.
Vendimi i FIFA-s për të lejuar regjistrimet e hershme për skuadrat që konkurrojnë në Kupën e Botës për Klube të zgjeruara ka çuar në këtë ndryshim të përkohshëm.
Faza e parë e afatit do të zgjasë nga 1 qershori deri më 10 qershor, duke lejuar Chelsean dhe Manchester Cityn – përfaqësuesit e vetëm të Anglisë në turne – të regjistrojnë lojtarë të rinj herët.
Pas një pauze të shkurtër, afati do të rihapet më 16 qershor dhe do të qëndrojë e hapur deri më 1 shtator, duke mbajtur brenda kufirit tradicional 12-javor.
Disa drejtorë sportivë të klubeve kishin kërkuar që afati kalimtar të mbyllej përpara fillimit të sezonit më 16 gusht, por shqetësimet për humbjen e lojtarëve nga klubet evropiane pa qenë në gjendje t’i zëvendësonin ata çuan në një rezultat tjetër.
Në vitin 2018, përpjekja e Ligës Premier për të mbyllur afatin herët rezultoi mbrapsht kur ligat e tjera evropiane nuk e ndoqën shembullin.
Bisedimet për harmonizimin e afateve të transferimeve në pesë ligat më të mira të Evropës janë duke vazhduar, me Bundesligën që tregon mbështetjen më të madhe për idenë.
Megjithatë, për momentin, Liga Premier ka vendosur se nuk mund të veprojë në mënyrë të pavarur dhe do të ndryshojë afatin vetëm nëse të gjitha ligat kryesore bien dakord.
