Chelsea e tall brutalisht Arsenalin me një postim të egër

Klubi londinez, Chelsea i hodhi kripë plagëve të rivalit të tyre lokal, Arsenalit pasi “Topçinjtë” u eliminuan nga Liga e Kampionëve nga Paris Saint-Germain, të mërkurën mbrëma.

Arsenali hyri në ndeshjen e kthimit gjysmëfinale të Ligës së Kampionëve të mbrëmshme me një gol disavantazh në total, pasi pësoi një humbje 1-0 ndaj PSG-së falë një goli të Ousmane Dembele javën e kaluar.

Gjithmonë do të ishte një detyrë e vështirë të përmbysej disavantazhi në një stadium të zhurmshëm si “Parc des Princes” të mërkurën, dhe shpresat e Arsenalit për një rezultat pozitiv u shuan shpejt kur Fabian Ruiz shënoi një gol të mrekullueshëm duke e mposhtur portierin David Raya në minutën e 27-të.

Pavarësisht se Raya, i ofroi skuadrës së Mikel Artetas një shkëndijë shprese duke pritur një penallti të Vitinhas në minutën e 69-të, vetëm tre minuta më vonë, Achraf Hakimi shënoi një gol të bukur duke dyfishuar epërsinë.

Bukayo Saka shënoi një gol ngushëllimi në fund të ndeshjes, por ishin kampionët francezë ata që kaluan në finalen e Mynihut më 31 maj dhe do të përballen me Interin në këtë ndeshje spektakolare.

Largimi i Arsenalit ia mbajti Chelseat pozicionin si i vetmi klub londinez që ka fituar një Ligë të Kampionëve – në sezonet 2011/12 dhe 2020/21 – dhe ata nxituan të postonin në rrjetet sociale pas ndeshjes së mbrëmshme.

“Nesër kthehemi në shtëpi. Synojmë të arrijmë në një finale evropiane për herë të tetë në historinë tonë”, shkroi Chelsea në postimin e tyre, si një referencë për ndeshjen e tyre të dytë gjysmëfinale të Ligës së Konferencës kundër Djurgardens, e cila do të zhvillohet sot (e enjte) nga ora 21:00.

Por, disa tifozë mendojnë se ky postim ishte një tallje ndaj Arsenalit.

“Klubi im po tallet me Arsenalin”, “Koha e këtij postimi është djallëzore” dhe “Tallje e pajustifikuar, por unë e adhuroj”, ishin disa nga komentet e tifozëve.

Nëse Chelsea vazhdon ta fitojë këtë garë, ata do të bëhen skuadra e parë angleze që fiton të tre garat kryesore evropiane për klube, pasi më parë kanë fituar Ligën e Kampionëve dhe Ligën e Evropës.

Skuadra e Enzo Marescas hyn në këtë ndeshje me një avantazh prej tre golash, pasi fitoi 4-1 në Suedi javën e kaluar. Ata do të përballen me fituesin e ndeshjes Fiorentina-Real Betis, ku spanjollët kanë avantazh 2-1 nga ndeshje e parë.