Napoli i sigurtë për titullin, fillon planifikimi i paradës me autobus në qytet

Drithërimat e përjetuara në natën e të dielës duket se kanë kaluar shpejt të Napolit, ku po përgatitet festa e madhe e titullit kampion. Pa kaluar 24 orë nga nata dramatike ku rrezikuan të humbnin kreun napolitanët kanë nisur planifikimin e festës të premten e pas saj.

Të premten Napoli luan në shtëpi ndaj Kaljarit për javën e fundit të kampionatit dhe një fitore e bën çështje të kryer titullin kampion.

Kësisoj të gjitha autoritetet lokale kanë nisur bashkëpunimin me klubin për të organizuara sa më mirë ditën e ndeshjes e atë që vjen pas saj.

Është bërë plani i bllokimit të rrugëve në qytet për festën pas ndeshjes, ndërsa po ideohet edhe parada me autobus e skuadrës kampione.

Festa me autobus në rrugët e qytetit pritet të zhvillohet të shtunën apo të dielën, por do të saktësohet në një tjetër mbledhje që do të zhvillohet nesër.